Galaconcert 2019

D’Schëtter Musek spillt hiren Galaconcert 2019 FANTASIA

e Samschdeg, den 18. Mee 2019 ëm 20.00 Auer am Centre Culturel zu  Mënsbech ënnert der Direktioun vum Rudi De Bouw

Wéi all Joer gëtt en Deel vun dësem Concert vun de Schëtter Jongbléiser gespillt.
Mir invitéieren Iech ganz häerzlech op dëse Concert.

Mir freeën eis op Äre Besuch den 18. Mee 2019





50. Gebuertsdag

50 Joer Schëtter Jongbléiser a Schëtter UGDA-Museksschoul

Dëst Joer steet de 50. Gebuertsdag vun de Schëtter Jongbléiser a vun der Schëtter UGDA-Museksschoul am Kalenner.

Aus dësem Grond gouf den 16. Mäerz 2019 am Centre Culturel zu Mënsbech grëndlech gefeiert.

De President vun der Schëtter Musek war houfreg fir den Här Gilles Lacour, Vertrieder vum entschëllegten Educatiounsminister, den Här Paul Scholer, Direkter vun der UGDA-Museksschoul, den Här Claude Marson, Schäffen a Vertrieder vum Buergermeeschter an och d’Vertrieder vun der Gemeng Schëtter ze begréissen an engem volle Sall Merci ze soen.

D’Geschicht vun de Schëtter Jongbléiser an der UGDA Musekschoul sou wéi d’Wichtegkeet vun der Jugendaarbecht gouf vun all de Festriedner ënnerstrach.

Eng ronn 200 Gebuertsdagsgäscht hunn e flotten a faarwegen Owend materlieft.

Um Programm stoung e Concert vun de Jongbléiser vun 2019 ënnert der Direktioun vum Romain Kerschen an dëst deelweis mat der Participatioun vu Solfège- a Gesanksschüler aus der Schëtter Museksschoul.

En Orchester aus 35 fréieren Jongbléiser huet ënner der Direktioun vum Jean-Luc Blasius (Fréier Dirigent vun de Jongbléiser) gespillt a fir Stëmmung gesuergt.

Duerno gouf de Gebuertsdagskuch opgeschnidden an et gouf gefeiert. Et war fir vill eng Geleeënheet fir sech erëmzegesinn, ze feieren an al Anekdoten auszetauschen.

An enger flotter Fotosausttellung goufen Biller an Erënnerungen iwwer 50 Joer Schëtter Jongbléiser gewisen.

De 18. Mee 2019 dierf nach emol bei Geleeënheet vum Galaconcert vun der Schëtter Musek a Jongbléiser gefeiert ginn. Den Ofschloss vum 50. Gebuertsdag ass dann de 17. November 2019 mat engem Concert vun e puer Jugendmuseken aus der Géigend.

Text : Jean-Paul Schaul

Photo: Photoclub Schëtter

50 Joer Jongbléiser

Dëst Joer steet de 50. Gebuertsdag vun de Schëtter Jongbléiser a vun der Schëtter UGDA-Museksschoul am Kalenner.

Dëse Gebuertsdag feiere mir den Samschdeg, 16. Mäerz 2019 ëm 19.00 Auer am Centre Culturel an der Dällt, 185, rue Principale zu 5366 Mënsbech.

Um Programm steet e Concert vun de Jongbléiser vun 2019 ënnert der Direktioun vum Romain Kerschen an dëst deelweis mat der Participatioun vu Solfège- a Gesanksschüler aus eiser Museksschoul. En Orchester aus fréieren Jongbléiser spillt ënner der Direktioun vum Jean-Luc Blasius (Fréier Dirigent vun de Jongbléiser). Duerno gëtt de Gebuertsdagskuch opgeschnidden.An enger flotter Fotosausttellung gi Biller an Erënnerungen iwwer 50 Joer Schëtter Jongbléiser gewisen.

Mir invitéieren heimat all fréier Jongbléiser, Musikantinnen, Musikanten an all Frënn vun de Schëtter Jongbléiser a Schëtter Musek op dësen Owend. Et ass bestëmmt eng wonnerbar Geleeënheet fir sech erëmzegesinn, ze feieren an al Anekdoten auszetauschen.
Dir kënnt och gären am Orchester vun de fréieren Jongbléiser matspillen. Fir déi 2 Stécker sinn 2 Prouwe geplangt. Kommt laanscht…
Mir wiere frou wann dir derbäi wiert. Wann dir nach fréier Membere kennt, kënnt dir dëse Message gäre weiderginn.
Et hëlleft eis, wann dir iech umellt, da kënne mir iech nach e Programm schécken (spontan geet natierlech och). Maacht dat iwwer Schettermusek@gmail.com oder beim President vun der Schëtter Musek, demJean-Paul Schaul (jpschaul@pt.lu an 691 529 294)
Jean-Paul Schaul
President vun der Schëtter Musek

Nostalgie, Nostalgie!

Sou, et ass erëm sou wäit!

Eng Konstant an dësem Liewen, an deem villes sou séier geet.
Kandheetserënnerungen.
Back to the roots.
Hierschtufanksgefill.
Duerfgemeinschaft.
Zen ginn duerch ëmmer erëm déiselwecht Aarbecht.

Wéi all Joer, Enn August, kacht d’Schëttermusek erëm Quetschekraut.
Schued, datt een dës Biller net riche kann, soss hätt dir elo och déi gutt Mëschung vun Holzfeier a waarmem Quetschekraut an der Nues.

An den nächsten 10 Deeg maache mir, d’Musikante vu Schëtter, ënnerstëtzt vun de Leit aus dem Duerf, véieranhallef Tonne Quetschen aus der Regioun op an zwaffen doraus Quetschekraut.
Verkaf: op der Plaz selwer (Museksbau Schëtter, 115 rue Principale, all Dag vu moies 7 bis owes 19:00 bis den 2. September) an an der Belle Étoile (7. an 8. September).

 

 

Quetschefest 2018

Léif Awunner vun der Gemeng Schëtter, Frënn vun der Schëtter Musek,
Et ass dëst Joer scho fir d’ 44. Kéier, datt d‘Schëtter Musek op hiert traditionellt Quetschefest invitéiert. Wärend 10 Deeg gëtt vu moies bis owes Quetschekraut gekacht – am ganze gi ronn 4500 kg Quetsche verschafft.
Dir sidd häerzlech invitéiert, bei eis laanscht ze kommen an déi aus frëschen, zeidege Quetsche gekachte Spezialitéit ze kafen. Mir verkafen d’ Quetschekraut am Amaachglas mat Deckel (1 Liter) oder am klenge Glas (440ml). Äert Gebeess hält sech op déi Manéier wärend Méint.
Verkaaft gëtt all Dag tëschent dem 26. August an dem 2. September 2018 vu 7h00 bis 19h00 Auer an eisem Museksbau zu Schëtter (115, rue Principale). De 26. August gëtt et Béier vum Faass oder soss eppes géint den Duuscht, kommt a feiert mat eis!
Dir kënnt och gären den 7. an 8. September op eise Stand an d‘Belle Etoile op Bartreng laanschtkommen. Do verkafe mir eist Quetschekraut, grad sou wéi Taarten, Bauerebrout a Quetschendrëpp.

Wann Dir nach Froen hutt, schéckt eis en Email op schettermusek@gmail.com oder rufft un um 691 529 294.
Mir freeën eis iwwert Äre léiwe Besuch.

Tombola-Gewënner

D’Tombola ass gezunn:

  1.  584 een Bong vun Emile Weber fir 300€
  2.  510 een Bong fir d’Pizzeria Osteria del Bivio vun 100€
  3.  192 eng Corbeille vun der Moutarderie Luxembourg

Wann Dir gewonnen hutt kënnt Dir Iech iwwert eise Kontakt-Formular mellen.

ING Marathon 2018

Um Kilometer 28 huet eis Equipe d’Leefer vum ING-Marathon mat Stëmmungs-Musek ugefeiert.
Mir soen och hei nach emol villmools Merci fir de Sponsoring vun der Fiduciaire Sassel & Cie.

Méi Fotoen fannt dir op eisem Facebook – Site.

Programm Gala 5.Mee2018

Gala Concert 2018 – Schëtter Musek
Direktioun: Rudi De Bouw

Centre Culturel Minsbech

Programm:
North and South Bill Conti, Arr. Roland Smeets
Orient Express Philip Sparke
Robinson Crusoe Bert Appermont
Around the world in 80 days Otto Schwarz

Entracte

Schëtter Jongbléiser
Sunliner (Concert March) Eric Osterling
Into the clouds Richard L. Saucedo
Disney Film Favorites Arr. Johnnie Vinson

Jupiter Hymn Gustave Holst; Arr. Johan de Meij
mat der Participatioun vun der Schëtter Musek

Schëtter Musek
Pacific dreams Jacob de Haan

Pirates of the Carribbean Klaus Badelt

Fly me to the moon Bart Howard, Arr. Takashi Hoshide

Caravan Duke Ellington, Arr. N. Iwai, J.D.Playbar

Eng gutt Equipe

Mat engem flotten Trupp Leit waren mir am vollen Asatz. Lo geet et duerch d’Duerf fir d’Kränz ze verdeelen an dobäi ze musizéieren.

Traditioun 1. Mee

Wéi all Joers ass och dësen 1. Mee d’Musek am Bësch.
Do maache mir Meekränz a ginn déi dono duerch d’Gemeng verdeelen.
Dëst mat eisen Instrumenter fir dass mir bei all Statioun ee Ständche spille kënnen.